Psalms 56

לַמְנַצֵּ֤חַ ׀ עַל ־ י֬וֹנַת אֵ֣לֶם רְ֭חֹקִים לְדָוִ֣ד מִכְתָּ֑ם בֶּֽאֱחֹ֨ז אֹת֖וֹ פְלִשְׁתִּ֣ים בְּגַֽת ׃

חָנֵּ֣נִי אֱ֭לֹהִים כִּֽי ־ שְׁאָפַ֣נִי אֱנ֑וֹשׁ כָּל ־ הַ֝יּ֗וֹם לֹחֵ֥ם יִלְחָצֵֽנִי ׃

שָׁאֲפ֣וּ שׁ֭וֹרְרַי כָּל ־ הַיּ֑וֹם כִּֽי ־ רַבִּ֨ים לֹחֲמִ֖ים לִ֣י מָרֽוֹם ׃

י֥וֹם אִירָ֑א אֲ֝נִ֗י אֵלֶ֥יךָ אֶבְטָֽח ׃

בֵּאלֹהִים֮ אֲהַלֵּ֪ל דְּבָ֫ר֥וֹ בֵּאלֹהִ֣ים בָּ֭טַחְתִּי לֹ֣א אִירָ֑א מַה ־ יַּעֲשֶׂ֖ה בָשָׂ֣ר לִֽי ׃

כָּל ־ הַ֭יּוֹם דְּבָרַ֣י יְעַצֵּ֑בוּ עָלַ֖י כָּל ־ מַחְשְׁבֹתָ֣ם לָרָֽע ׃

יָג֤וּרוּ ׀ יצפינו הֵ֭מָּה עֲקֵבַ֣י יִשְׁמֹ֑רוּ כַּ֝אֲשֶׁ֗ר קִוּ֥וּ נַפְשִֽׁי ׃

עַל ־ אָ֥וֶן פַּלֶּט ־ לָ֑מוֹ בְּ֝אַ֗ף עַמִּ֤ים ׀ הוֹרֵ֬ד אֱלֹהִֽים ׃

נֹדִי֮ סָפַ֪רְתָּ֫ה אָ֥תָּה שִׂ֣ימָה דִמְעָתִ֣י בְנֹאדֶ֑ךָ הֲ֝לֹ֗א בְּסִפְרָתֶֽךָ ׃

אָ֥֨ז יָ֘שׁ֤וּבוּ אוֹיְבַ֣י אָ֭חוֹר בְּי֣וֹם אֶקְרָ֑א זֶה ־ יָ֝דַ֗עְתִּי כִּֽי ־ אֱלֹהִ֥ים לִֽי ׃

בֵּֽ֭אלֹהִים אֲהַלֵּ֣ל דָּבָ֑ר בַּ֝יהוָ֗ה אֲהַלֵּ֥ל דָּבָֽר ׃

בֵּֽאלֹהִ֣ים בָּ֭טַחְתִּי לֹ֣א אִירָ֑א מַה ־ יַּעֲשֶׂ֖ה אָדָ֣ם לִֽי ׃

עָלַ֣י אֱלֹהִ֣ים נְדָרֶ֑יךָ אֲשַׁלֵּ֖ם תּוֹדֹ֣ת לָֽךְ ׃

כִּ֤י הִצַּ֪לְתָּ נַפְשִׁ֡י מִמָּוֶת֮ הֲלֹ֥א רַגְלַ֗י מִ֫דֶּ֥חִי לְ֭הִֽתְהַלֵּךְ לִפְנֵ֣י אֱלֹהִ֑ים בְּ֝א֗וֹר הַֽחַיִּֽים ׃